काठमाडौँ, साउन ३१ गते। नेपाली कांग्रेसका निवर्तमान सभापति एवं पूर्वप्रधानमन्त्री शेरबहादुर देउवाले मुलुकको न्यायालयले विगतदेखि नै आफूलाई न्याय दिँदै आएको उल्लेख गर्दै न्यायालयप्रति पूर्ण विश्वास रहेको बताउनुभएको छ।
कांग्रेसको संस्थापन पक्षइतरको तीनदिने राष्ट्रिय भेला समापनका अवसरमा आज उहाँले पञ्चायतकालदेखि नै आफू र आफ्नो पार्टीलाई न्यायालयले न्याय दिएको बताउनुभयो।
“विगतमा मलाई राजाले थुन्दा पनि न्यायालयले शाही आयोग खारेज गरेको हो। अहिले पनि हाम्रो पार्टीको आधिकारिकतासम्बन्धी विषय सर्वोच्च अदालतमा छ। न्याय पाइने अपेक्षा गरेका छौँ,” पूर्वप्रधानमन्त्री देउवाले भन्नुभयो।
उहाँले विशेष महाधिवेशनले पार्टीमा विभाजन ल्याउने भन्दै आफूले त्यस्तो नगर्न आग्रह गरेको स्मरण गराउनुभयो।
फरक प्रसङ्गमा पूर्वप्रधानमन्त्री देउवाले आफू हिन्दू धर्मावलम्बी भएको र हिन्दू संस्कार मान्दै आएको उल्लेख गर्दै कसैलाई पनि हिन्दू धर्म मान्नबाट वञ्चित गर्न नहुने बताउनुभयो। “बुद्ध धर्मप्रति पनि मेरो उत्तिकै श्रद्धा छ। अन्य धर्मावलम्बी र प्राकृतिक धर्म मान्ने सबैप्रति मेरो सम्मान छ,” उहाँले भन्नुभयो।
पूर्वप्रधानमन्त्री देउवाले पार्टीका नेताकार्यकर्ताबाट ठूलो साथ र सद्भाव पाएको उल्लेख गर्दै त्यसलाई कहिल्यै नबिर्सने बताउनुभयो। उहाँ स्वास्थ्य उपचार सकेर पाँच महिनापछि बिहीबार मात्रै स्वदेश फर्कनुभएको थियो।
पार्टीका पूर्वमहामन्त्री एवं भेलाका संयोजक डा. शशाङ्क कोइरालाले पार्टीलाई एकताबद्ध बनाउन सम्मेलन आयोजना गरिएको बताउँदै यसैका कारण सबै नेताकार्यकर्ताबीच भेटघाट र छलफलको अवसर जुटेको उल्लेख गर्नुभयो। उहाँले सम्मेलनले विभिन्न पाँचवटा प्रतिवेदन पारित गरेको जानकारी दिँदै सहभागी सबैलाई धन्यवाद दिनुभयो।
सम्मेलनले पार्टीको आगामी १५औँ महाधिवेशनको तयारी, सनातन धर्म मान्न पाउने स्वतन्त्रता, संविधानमा समसामयिक संशोधनलगायत विभिन्न प्रस्तावसमेत पारित गरेको छ।
शुक्रबारदेखि सुरु भएको तीनदिने भेलामा शनिबार पार्टीका शीर्ष नेताहरू विमलेन्द्र निधिले राजनीतिक, डा. प्रकाशशरण महतले आर्थिक, एनपी साउदले समसामयिक, रमेश लेखकले कानुन तथा विधान र उमाकान्त चौधरीले सांगठनिकसम्बन्धी प्रस्ताव प्रस्तुत गर्नुभएको थियो।
यसैगरी, शनिबार भेलालाई विधानअनुसारको स्वरूप दिन सम्मेलनमा परिणत गरिएको थियो। प्रचार–प्रसार समिति संयोजक मीन विश्वकर्माका अनुसार सबै प्रतिवेदनमाथि प्रदेशगत रूपमा छलफल गरी प्रदेशगत धारणा र प्रस्तुति लिएपछि सम्मेलन आज समापन गरिएको हो।
कांग्रेसको गत पुस २७ देखि ३० गतेसम्म भएको विशेष महाधिवेशनले तत्कालीन महामन्त्री गगनकुमार थापालाई सभापतिमा चयन गर्दै नयाँ केन्द्रीय कार्यसमिति निर्वाचित गरेको थियो। विशेष महाधिवेशनमा सहभागी नभएको तत्कालीन संस्थापन पक्षले विशेष महाधिवेशनलाई अवैध भन्दै निर्वाचन आयोगमा उजुरी दिएको थियो।
आयोगले विशेष महाधिवेशनबाट निर्वाचित समितिलाई मान्यता दिएपछि असन्तुष्ट पक्ष सर्वोच्च अदालत पुगेको थियो। सर्वोच्च अदालतले पनि आयोगको निर्णयलाई नै मान्यता दिएको थियो। त्यसपछि असन्तुष्ट पक्षले आधिकारिकतासम्बन्धी निर्णय पुनरावलोकनका लागि दिएको निवेदनमाथि पुनः सुनुवाइ गर्दै सर्वोच्च अदालतको पूर्ण इजलासले यही साउन २१ गते निस्सा दिएको छ।
