भोटेकोशी बाढी : उद्धार, राहत र उच्च सतर्कताका लागि सरकारलाई राप्रपा अध्यक्ष लिङ्देनको आग्रह

राष्ट्रिय

गृहपृष्ठ
राष्ट्रिय
भोटेकोशी बाढी : उद्धार, राहत र उच्च सतर्कताका लागि सरकारलाई राप्रपा अध्यक्ष लिङ्देनको आग्रह

भोटेकोशी बाढी : उद्धार, राहत र उच्च सतर्कताका लागि सरकारलाई राप्रपा अध्यक्ष लिङ्देनको आग्रह

बुधबार, भदौ १०, २०८३ राष्ट्रिय समाचार

काठमाडौं, भदौ १० — राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले रसुवाको भोटेकोशी नदीमा आएको भीषण बाढीबाट प्रभावित नागरिकको उद्धार, राहत र पुनःस्थापनाका लागि सरकारलाई तत्काल उच्चतम प्राथमिकताका साथ काम गर्न आग्रह गरेका छन्।
बुधबार जारी वक्तव्यमा अध्यक्ष लिङ्देनले टिमुरे, स्याफ्रुबेसी लगायत आसपासका क्षेत्रमा भएको क्षतिको प्रारम्भिक खबरले आफू अत्यन्तै मर्माहत भएको बताएका छन्। उनले बाढीमा परी ज्यान गुमाएकाहरूप्रति हार्दिक श्रद्धाञ्जली व्यक्त गर्दै घाइतेहरूको शीघ्र स्वास्थ्य लाभको कामना गरेका छन्। साथै, बाढीबाट विस्थापित नागरिकप्रति गहिरो सहानुभूति प्रकट गरेका छन्।
लिङ्देनले क्षतिको पूर्ण विवरण प्राप्त नभइसकेको संवेदनशील अवस्थामा सरकारका सबै संयन्त्रलाई उच्च सतर्कता र तत्परताका साथ परिचालन गरी मानिसको जीवन रक्षा, बेपत्ताको खोजी, उद्धार, उपचार तथा तत्काल राहतलाई पहिलो प्राथमिकतामा राख्न आग्रह गरेका छन्।
उनले विशेषगरी भोटेकोशी, त्रिशूली तथा तल्लो तटीय क्षेत्रमा जोखिममा रहेका नागरिकलाई समयमै सुरक्षित स्थानमा स्थानान्तरण गर्न, आवश्यक सुरक्षा व्यवस्था मिलाउन तथा खाद्यान्न, औषधि, खानेपानी र अस्थायी आवासको व्यवस्था गर्न सम्बन्धित निकायबीच प्रभावकारी समन्वय आवश्यक रहेको उल्लेख गरेका छन्।
वक्तव्यमा विपद्को घडीमा सरकारको उपस्थिति पीडित नागरिकको घरदैलोमै अनुभूति हुने गरी देखिनुपर्नेमा जोड दिँदै उद्धार र राहतमा तत्काल सक्रिय भई थप मानवीय क्षति हुन नदिन प्रभावकारी अग्रसरता लिन सरकारसँग आग्रह गरिएको छ।
अध्यक्ष लिङ्देनले विपद्को यस घडीमा राप्रपा सरकारको साथमा रहने विश्वास दिलाउँदै पार्टीका सबै तहका नेता, कार्यकर्ता तथा शुभेच्छुकलाई स्थानीय प्रशासनसँग समन्वय गरेर उद्धार, राहत र मानवीय सहयोगका कार्यमा सक्रिय हुन आह्वान गरेका छन्। विशेषगरी रसुवा, नुवाकोट, धादिङ, गोरखा, चितवन र नवलपुरका पार्टी नेतृत्व तथा सदस्यलाई जोखिममा रहेका परिवारलाई सुरक्षित स्थानमा सार्न र राहत कार्यमा तत्काल जुट्न अपिल गरेका छन्।
राप्रपाले भोटेकोशी बाढीबाट प्रभावित सम्पूर्ण नागरिकसँग दुःखको यस घडीमा पार्टी साथमा रहेको विश्वास पनि व्यक्त गरेको छ।

प्रकाशित मिति: बुधबार, भदौ १०, २०८३ १८:२८

प्रतिक्रिया दिनुहोस्