काठमाडौँ । नेकपा एमालेले आफ्नो ११औं महाधिवेशन मंसिर महिनाको अन्तिम साता गर्ने निर्णय गरेको छ। बुधबार सम्पन्न केन्द्रीय सचिवालयको बैठकले महाधिवेशनको मिति निश्चित गर्दै आवश्यक तयारी तत्काल सुरु गर्ने निर्णय गरेको हो।
बैठकपछि पत्रकारहरूसँग कुरा गर्दै एमालेका उपमहासचिव प्रदीप ज्ञवालीले मंसिरको अन्तिम साताभित्र महाधिवेशन सम्पन्न गर्ने तयारी तीव्र पारिएको बताए। उनले भने, “मंसिरको अन्तिम सातामा ११औं महाधिवेशन आयोजना गर्ने निर्णय भएको छ। यसका लागि देशभरका सबै संगठनहरूलाई तयारीमा जुट्न निर्देशन दिइएको छ।”
उनका अनुसार, महाधिवेशनका लागि कार्यदल गठन, प्रतिनिधि चयन, नीतिगत प्रस्ताव तयारी र विधान संशोधनसम्बन्धी प्रारम्भिक छलफल सुरु भइसकेको छ।
एमालेले यसअघि सन् २०२१ मा चितवनमा १०औं महाधिवेशन गरेको थियो। त्यसपछि पहिलोपटक पार्टी राष्ट्रिय महाधिवेशनमा जान लागेको हो।
पार्टी स्रोतका अनुसार, यस महाधिवेशनमा नेतृत्व चयनसँगै पार्टीको नीति, विचार र संगठनात्मक दिशाबारे व्यापक समीक्षा गरिनेछ। साथै, आगामी निर्वाचनका लागि रणनीति तय गर्ने, स्थानीय तहदेखि केन्द्रीय तहसम्मको संरचना पुनर्गठन गर्ने एजेन्डा समेत रहनेछ।
एमालेले अहिले देशभरका जिल्ला र प्रदेश समितिहरूलाई मंसिर महाधिवेशन लक्षित अभियान सञ्चालन गर्न निर्देशन दिएको छ।
पार्टी अध्यक्ष केपी शर्मा ओलीले निकट भविष्यमै सम्पूर्ण प्रदेशहरूमा जाने र कार्यकर्ता भेलालाई सम्बोधन गर्ने तयारीसमेत गरिरहेको बताइएको छ।
सचिवालय बैठक स्रोतका अनुसार, यसपटकको महाधिवेशनबाट नेतृत्व परिवर्तन हुनेछ ।
