काठमाडौँ । इरानको राजधानी तेहरानमा रहेको राष्ट्रिय प्रसारण सेवाको भवनमा आक्रमण हुँदा एक सरकारी टिभी कर्मचारीको मृत्यु भएको छ। इरानको सरकारी समाचार संस्था फार्स न्युज एजेन्सीका अनुसार आक्रमण इस्लामिक रिपब्लिक अफ इरान न्युज नेटवर्कको भवनमा भएको थियो।
मसौमेह आजिमी नाम गरेकी उनी इस्लामिक रिपब्लिक अफ इरान ब्रोडकास्टिङमा कार्यरत थिइन्। घटनाको भिडियोमा स्टुडियोमै मिसाइल प्रहार हुँदा समाचार प्रस्तोता बिचमै रोकिन परेको देखिन्छ।
इरानको सरकारी विवरण अनुसार शुक्रबारदेखि इजरायलद्वारा सुरु भएको हवाई आक्रमणमा अहिलेसम्म २२४ जना मारिएका छन्। इजरायली प्रधानमन्त्री नेतन्याहूको कार्यालयले इरानको जवाफी हमलामा इजरायलमा कम्तीमा २४ जनाको मृत्यु भएको जनाएको छ।
इरानमाथि भएको सन्दिग्ध इजरायली हवाई आक्रमणका कारण इरानको सरकारी टेलिभिजनको प्रत्यक्ष प्रसारण अचानक अवरुद्ध भएको छ। आक्रमणको समयमा खिचिएको भिडियो फुटेजमा प्रत्यक्ष प्रसारण भइरहेको बेला विस्फोटको आवाज र त्यसपछिको अस्तव्यस्तताको क्षण कैद भएको छ, जसले मध्यपूर्वमा तनावलाई थप बढाएको छ।
सामाजिक सञ्जालमा भाइरल भएको भिडियोमा इरानी सरकारी टिभीका एक समाचार बाचकले समाचार प्रस्तुत गरिरहेको देखिन्छ। अचानक, पृष्ठभूमिमा ठुलो विस्फोटको आवाज सुनिन्छ र क्यामेरा हल्लिन्छ। केही क्षणको अनिश्चिततापछि, प्रसारण काटिन्छ र स्क्रिनमा प्राविधिक गडबडीको सङ्केत देखिन्छ।
यो घटनाले आक्रमणको प्रभाव कति अप्रत्याशित र प्रत्यक्ष थियो भन्ने स्पष्ट पारेको छ। सरकारी टिभीको प्रसारणमा नै अवरोध आउनुले आक्रमण इरानको संवेदनशील नजिक भएको सङ्केत गर्दछ।
पछिल्ला आक्रमणहरूले दुई देशबिचको तनावलाई नयाँ खतरनाक मोडमा पुर्याएको छ र पूरै मध्यपूर्वको स्थायित्वमाथि गम्भीर प्रश्न खडा गरेको छ।
–एजेन्सी
