सांसदको छड्के निरीक्षण

राजनीति

गृहपृष्ठ
राजनीति
सांसदको छड्के निरीक्षण

सांसदको छड्के निरीक्षण

बुधबार, साउन ६, २०८३ राष्ट्रिय समाचार

तनहुँ क्षेत्र नम्बर २ का प्रतिनिधि सभा सदस्य ई. श्रीराम न्यौपानेले भूमि प्रशासन कार्यालय तनहुँको मङ्गलबार छड्के निरीक्षण गर्नुभएको छ ।

कार्यालयका तल्लो तहका कर्मचारीबाट सेवाग्राहीसँग अनधिकृत रूपमा घुस लिने गरेको गुनासो आएपछि कार्यालयको निरीक्षण गरिएको सांसद न्यौपानेले बताउनुभयो । “घुस नदिनुहोस्, घुस मागे चुप लागेर नबस्नुहोस् । एक रुपियाँ पनि नदिनुहोस् । घुस लिने र दिने कुनै पनि बहाना स्वीकार्य हुँदैन,” उहाँले भन्नुभयो ।

सांसद न्यौपानेले कार्यालय प्रमुख राजेन्द्रप्रसाद पौडेलसँग भेट गरी सेवाग्राहीबाट घुस मागिएको गुनासो आउने अवस्थाको अन्त्य गर्न निर्देशन दिनुभयो । कार्यालय प्रमुख पौडेलले कार्यालयपरिसरमा बिचौलियाको प्रवेशलाई समेत नियन्त्रण गरिएको र आफूले कुनै पनि प्रकारको घुस नलिएको बताउनुभयो । सांसद न्यौपानेले विगतको तुलनामा घुसखोरीसम्बन्धी गुनासो घटेको भए पनि पूर्ण रूपमा अन्त्य नभएको जानकारी आएपछि कार्यालयको अवस्थाबारे बुझ्न छड्के निरीक्षणमा आएको बताउनुभयो ।

सांसद न्यौपानेले सेवाग्राहीको गुनासो पनि सुन्नुभएको थियो । सांसद न्यौपानेले भन्नुभयो, “घुस र अनियमितताको स्थान हुँदैन । पैसा नदिनुहोस् घुस मागेमा तत्कालै सार्वजनिक गर्नुहोस् ।’’

प्रमुख जिल्ला अधिकारी शिवलाल तिवारीले मालपोत कार्यालयको निरीक्षण गरिहेको, बिचौलियालाई कार्यालय भित्र पस्न निषेध गरिएको बताउनुभयो । घुस मागेमा तत्काल जानकारी दिन सेवाग्राहीलाई प्रजिअ तिवारीले आग्रह गर्नुभयो । शासकीय सुधार अन्तर्गतका सङ्घ सरकारले गरेको प्रतिबद्धता कार्यान्वय गर्ने क्रममा मालपोतलगायत कुनै पनि कार्यालयमा बिचौलिया प्रवेश गर्न नदिइएको उहाँले बताउनुभयो ।

प्रकाशित मिति: बुधबार, साउन ६, २०८३ १६:४९

प्रतिक्रिया दिनुहोस्