१९५ रुपैयाँको औषधि, हजारौंको प्रक्रिया शुल्क? चिकित्सकीय शुल्कको पारदर्शितामाथि प्रश्न

समाचार

गृहपृष्ठ
समाचार
१९५ रुपैयाँको औषधि, हजारौंको प्रक्रिया शुल्क? चिकित्सकीय शुल्कको पारदर्शितामाथि प्रश्न

१९५ रुपैयाँको औषधि, हजारौंको प्रक्रिया शुल्क? चिकित्सकीय शुल्कको पारदर्शितामाथि प्रश्न

मंगलबार, साउन ५, २०८३ राष्ट्रिय समाचार

पोखरामा एक हाडजोर्नी विशेषज्ञ चिकित्सक डा. नीरज रञ्जितले घुँडाको उपचारका क्रममा प्रयोग गरिएको करिब १९५ रुपैयाँ मूल्यको औषधिमा सुई लगाएको भन्दै झण्डै ९ हजार ५०० रुपैयाँ प्रक्रिया शुल्क लिएको आरोप सार्वजनिक भएपछि निजी स्वास्थ्य सेवामा शुल्क निर्धारणको पारदर्शितामाथि बहस सुरु भएको छ।
पीडित पक्षका अनुसार केही सेकेन्डमै सम्पन्न भएको प्रक्रियाको शुल्क अत्यधिक भएको भन्दै उनीहरूले असन्तुष्टि जनाएका छन्। चिकित्सकले आफ्नो व्यावसायिक सेवाको शुल्क निर्धारण गर्न पाउने अधिकार भए पनि त्यसको आधार, मापदण्ड र बिरामीलाई दिइने जानकारी स्पष्ट हुनुपर्ने उपभोक्ता अधिकारकर्मीहरूको धारणा छ।
स्वास्थ्य नीति विज्ञहरूका अनुसार नेपालमा धेरै निजी उपचार प्रक्रियाको शुल्कमा एकरूप मापदण्ड नहुँदा बिरामी र चिकित्सकबीच विवाद बढ्ने गरेको छ। त्यसैले यस्ता गुनासाहरूमा सम्बन्धित अस्पताल, नेपाल मेडिकल काउन्सिल तथा नियामक निकायले तथ्यका आधारमा छानबिन गर्नुपर्ने आवश्यकता देखिएको छ।
उक्त घटनापछि सम्बन्धित चिकित्सकको व्यावसायिक नैतिकता र शुल्क निर्धारण प्रक्रियामाथि प्रश्न उठेको छ। यदि बिरामीलाई पर्याप्त जानकारी नदिई वा अनुचित शुल्क लिइएको पुष्टि भए त्यसले चिकित्सकीय आचारसंहितामाथि गम्भीर प्रश्न उठ्ने स्वास्थ्य क्षेत्रका जानकारहरूको भनाइ छ।
मनिपाल शिक्षण अस्पतालमा हाडजोर्नी विशेषज्ञका रूपमा कार्यरत डा. नीरज रञ्जितले पोखराकै अर्को एक निजी अस्पतालमा पुगेर गरेको गैरव्यवसायिक गतिविधिका कारण अहिले विवादमा तानिएका हुन्। मणिपाल मेडिकल कलेजमा हाजिर गर्ने तर मेडीप्लस नाम गरेको अर्कै निजी अस्पतालमा धाउने गरेको भन्दै यसअघि नै उनको व्यावसायिक आचरण र कार्यशैली विवादित बनेको थियो।
मनिपालमा आफूहरूले समेत उनको सेवा प्राप्त गर्न नसकेको भन्दै त्यहीका कर्मचारीहरुले यी डाक्टरको विरुद्ध कलेज प्रशासनमा उजुरी समेत दिएको समाचार स्रोतले बताएको छ। उनले मनिपालका बिरामीहरूलाई आफ्नो निजी क्लिनिक 'मेडीप्लस' मा जान प्रेरित गर्ने र अस्पतालको ड्युटी समयमा समेत निजी अभ्यासमा केन्द्रित हुने गरेको गम्भीर आरोप मणिपालकै अन्य चिकित्सक र कर्मचारीहरूले लगाउँदै आएका छन्।

प्रकाशित मिति: मंगलबार, साउन ५, २०८३ १२:५९

प्रतिक्रिया दिनुहोस्