विद्यालय भवन भऱ्याङबिनै निर्माण, विद्यालयले विज्ञप्तिमार्फत स्वीकार्यो

समाचार

गृहपृष्ठ
समाचार
विद्यालय भवन भऱ्याङबिनै निर्माण, विद्यालयले विज्ञप्तिमार्फत स्वीकार्यो

विद्यालय भवन भऱ्याङबिनै निर्माण, विद्यालयले विज्ञप्तिमार्फत स्वीकार्यो

आइतबार, असार २८, २०८३ राष्ट्रिय समाचार

कागेश्वरी मनोहरा नगरपालिका–६ स्थित नेपाल राष्ट्रिय निर्माण माध्यमिक विद्यालयमा करिब १ करोड रुपैयाँ लागतमा निर्माण भइरहेको भवनमा भऱ्याङ बिना संरचना निर्माण गरिएको विषय सार्वजनिक भएपछि विवाद चुलिएको छ।

सामाजिक सञ्जालमा भवनको तस्बिर सार्वजनिक भएसँगै निर्माण कार्यमाथि प्रश्न उठेपछि विद्यालयले विज्ञप्ति जारी गर्दै भवनको फिनिसिङ कार्य, फ्लोरिङ, फल्स सिलिङ तथा भऱ्याङलगायतका केही काम अझै बाँकी रहेको स्वीकार गरेको छ। विद्यालयका अनुसार स्वीकृत बजेटअनुसार हालसम्मको निर्माण सम्पन्न भए पनि बाँकी कामका लागि थप बजेट माग गरिएको र चरणबद्ध रूपमा निर्माण पूरा गरिने जनाएको छ।

तर सार्वजनिक रूपमा देखिएको भवनमा भऱ्याङबिनै संरचना निर्माण भएको अवस्थाले निर्माण प्रक्रिया, डिजाइन, प्राविधिक सुपरिवेक्षण तथा सार्वजनिक बजेटको प्रभावकारी उपयोगबारे गम्भीर प्रश्न उठाएको छ।

स्थानीयवासी तथा सरोकारवालाले सार्वजनिक रकमबाट निर्माण हुने शैक्षिक पूर्वाधारमा यस्तो अवस्था आउनु लापरवाही वा सम्भावित अनियमितताको संकेत हुन सक्ने भन्दै निष्पक्ष छानबिनको माग गरेका छन्। उनीहरूले निर्माणमा संलग्न निकाय, प्राविधिक, ठेकेदार कम्पनी तथा सम्बन्धित जिम्मेवार पक्षको भूमिकामाथि अनुसन्धान गरी आवश्यक कानुनी कारबाही गर्न माग गरेका छन्।

विद्यालय व्यवस्थापनले भने विद्यार्थीको सुरक्षालाई प्राथमिकतामा राख्दै भवन पूर्ण रूपमा निर्माण सम्पन्न भएपछि मात्र नियमित पठनपाठनका लागि सञ्चालनमा ल्याइने जनाएको छ।

प्रकाशित मिति: आइतबार, असार २८, २०८३ १२:१४

प्रतिक्रिया दिनुहोस्