अमेरिका–चीन मित्रता कसिलो, ट्रम्प १४ मा बेइजिङ जाने

अन्तर्राष्ट्रिय

गृहपृष्ठ
अन्तर्राष्ट्रिय
अमेरिका–चीन मित्रता कसिलो, ट्रम्प १४ मा बेइजिङ जाने

अमेरिका–चीन अमेरिका–चीन मित्रता कसिलो, ट्रम्प १४ मा बेइजिङ जाने

बिहीबार, चैत १२, २०८२ एजेन्सी

काठमाडौँ । इरानसँगको बढ्दो तनावका कारण अमेरिकी राष्ट्रपति डोनाल्ड ट्रम्पको चीन भ्रमणको नयाँ मिति सार्वजनिक भएको छ । ह्वाइट हाउसले जारी गरेको पछिल्लो विज्ञप्ति अनुसार, राष्ट्रपति ट्रम्प आगामी मे १४ र १५ तारिखमा बेइजिङ जाने भएका छन् ।

यसअघि ट्रम्प मार्च ३१ देखि अप्रिल २ सम्म चीन भ्रमणमा जाने तालिका थियो । तर, इरानमाथि अमेरिका र इजरायलले सुरु गरेको युद्धका कारण उक्त भ्रमण निर्धारित समयभन्दा पछि सारिएको हो ।

भ्रमणका क्रममा राष्ट्रपति ट्रम्पले चिनियाँ राष्ट्रपति सी जिनपिङसँग द्विपक्षीय भेटवार्ता गर्नेछन् । दुई देशबिच लामो समयदेखि जारी भन्सार युद्ध सन् २०२५ को अन्त्यतिर केही मत्थर भएपछि व्यापारिक सम्बन्धलाई पुनः गति दिने विषयमा छलफल हुने प्रारम्भिक योजना रहेको बताइएको छ ।

चीनले इरानमाथि अमेरिका र इजरायलले गरेको आक्रमणको औपचारिक बाहेक कुनै विरोध गरेको छैन । बेइजिङले युद्धरत पक्षहरूलाई संयमता अपनाउन र सैन्य बलको सट्टा संवादमार्फत समस्याको समाधान खोज्न आग्रह गर्दै आएको छ ।

चीनको यो मौन समर्थनबाट अमेरिका उत्साहित छ । योबिचमा हुन लागेको ट्रम्पको यो भ्रमणलाई कूटनीतिक रूपमा निकै महत्त्वका साथ हेरिएको छ ।

यो राष्ट्रपति ट्रम्पको दोस्रो कार्यकालको पहिलो बेइजिङ भ्रमण हुनेछ । यसअघि उनी सन् २०१७ मा आफ्नो पहिलो कार्यकालका क्रममा चीन पुगेका थिए । सात वर्षपछि हुन लागेको यो उच्चस्तरीय भ्रमणले विश्व राजनीति र अर्थतन्त्रमा कस्तो प्रभाव पार्छ भन्ने कुरामा सबैको चासो रहेको छ ।

–एजेन्सी

प्रकाशित मिति: बिहीबार, चैत १२, २०८२ ०६:१४