सदनमा प्रधानमन्त्रीको उपस्थिति अनिवार्य नभएको नियमावलीमै उल्लेख

राष्ट्रिय

गृहपृष्ठ
राष्ट्रिय
सदनमा प्रधानमन्त्रीको उपस्थिति अनिवार्य नभएको नियमावलीमै उल्लेख

प्रतिनिधि सभा सदनमा प्रधानमन्त्रीको उपस्थिति अनिवार्य नभएको नियमावलीमै उल्लेख

बुधबार, वैशाख ३०, २०८३ राष्ट्रिय समाचार

काठमाडौँ । प्रतिनिधि सभामा विपक्षी दलहरुले प्रधानमन्त्री बालेन्द्र शाहको अनिवार्य उपस्थिति खोजिरहेका छन् ।

संसदमा प्रधानमन्त्री शाहको उपस्थितिविना सरकारको नीति तथा कार्यक्रममाथिको छलफल अघि नबढ्ने अडान कसेपछि बुधवारको प्रतिनिधि सभा बैठकमा निकै होहल्ला मच्चियो ।

विपक्षीले लगातार अवरोध गरेपछि सभामुखले बाध्य भएर बैठक स्थगित गर्नुपर्‍यो।

अर्थमन्त्री डा. स्वर्णिम वाग्लेले प्रधानमन्त्रीको तर्फबाट सरकारको नीति तथा कार्यक्रम सदनमा टेबुल गरेपनि उनलाई विपक्षीले बोल्न दिएनन् ।

संसदको नियमावलीमा प्रधानमन्त्री कुनै कारवश सदनमा आउन नसकेको अवस्थामा प्रधानमन्त्रीले तोकेको प्रतिनिधिले जवाफ दिनसक्ने स्पष्ट व्यवस्था भएपनि विपक्षी दलहरुले सुनेनन् ।

अन्ततः बिहीबारलाई बैठक सरेको छ ।

प्रतिनिधि सभा नियमावलीको ३८ को (१) उपनियममा नीति तथा कार्यक्रम सम्बन्धी कार्यविधिको व्यवस्था छ । जसमा ‘राष्ट्रपतिबाट गरिएको सम्बोधनको लागि धन्यवाद प्रस्ताव पारित भएपछि राष्ट्रपतिबाट गरिएको सम्बोधनमा उल्लेखित नेपाल सरकारको नीति तथा कार्यक्रममाथि छलफल गर्नका लागि सभामुखले प्रधानमन्त्री वा निजको अनुपस्थितिमा निजले तोकेको कुनै मन्त्रीसँग परामर्श गरी दिन र समय तोक्ने र त्यसरी तोकिएको दिनमा दलीय प्रतिनिधित्वको आधारमा सम्बोधनमा रहेका विषयमा छलफल हुनेछ’ भनिएको छ ।

प्रकाशित मिति: बुधबार, वैशाख ३०, २०८३ २०:०५