काठमाडौँ । थाईल्यान्डकी ओपाल सुचाता चुआङ्स्री शनिबार हैदराबादमा सम्पन्न ७२औं मिस वर्ल्ड प्रतियोगितामा विजयी भइन्।
यस अन्तर्राष्ट्रिय प्रतियोगितामा उनले विश्वभरका १०८ राष्ट्रका प्रतिनिधिहरूलाई पछि पार्दै उपाधि जितिन्। इथियोपियाकी ह्यासेट डेरेजे अद्मासु पहिलो उपविजेता घोषित भइन्। चुआङ्स्रीले अघिल्लो वर्षकी विजेता, चेक गणतन्त्रकी क्रिस्टिना पिश्कोभाबाट मुकुट प्राप्त गरिन्।
७२औं मिस वर्ल्ड सौन्दर्य प्रतियोगिता हैदराबादमा आयोजना गरिएको थियो, जसको सह-सञ्चालन २०१६ की मिस वर्ल्ड स्टेफनी डेल भ्याले र इन्डियन प्रस्तोता सचिन कुंभारले गरेका थिए। इन्डियाले अघिल्लो वर्ष पनि यो प्रतियोगिता आयोजना गरेको थियो।
इन्डियाको प्रतिनिधित्व गरिरहेकी नन्दिनी गुप्ता शीर्ष २० सम्म पुग्न सफल भइन्, तर त्यसपछि प्रतियोगिताबाट बाहिरिइन्। सन् २०१७ मा मनुषी चिल्लरले अन्तिम पटक इन्डियाका लागि मिस वर्ल्डको उपाधि जितेकी थिइन्।
त्यसअघि रीता फारिया, ऐश्वर्या राय, डायना हेडन, युक्ता मुखी, र प्रियंका चोपडा मिस वर्ल्डको ताज पहिरिन सफल इन्डियन महिला हुन्।
मिस थाईल्यान्डको झिलिमिली पोशाक
चुआङ्स्रीले पोशाक प्रस्तुतीकरण चरणमा विशेषरूपमा डिजाइन गरिएको परम्परागत पोशाक पहिरिएकी थिइन्। सेतो झिलिमिली कपडामा ओपल जस्ता फूलहरू अंकित भएको पोशाकले उपचार र बलियोपनको सन्देश दिएको थियो।
चम्किलो सेतो कपडा र कोमल ओपल जस्ता फूलहरूले डरभन्दा आशालाई रोज्ने महिलाहरूलाई प्रतिबिम्बित गर्छ । ओपालले आफ्नो इन्स्टाग्राममा लेखेकी छन्। उनले थप लेखिन्, 'यसको हल्का फैलावटले करुणाको तरंगलाई देखाउँछ—कसरी एउटै मुटुले थुप्रै मनहरूलाई जागृत गराउन सक्छ। स्वारोवस्की क्रिस्टलहरूले हामीलाई अन्धकारमा उज्यालोतर्फ डोहोर्याउने आन्तरिक प्रकाशलाई झल्काउँछन्।'
उनले उक्त पोशाकलाई "Opal For HER" नामक प्रेरणादायी यात्राको श्रद्धाका रूपमा वर्णन गरिन्, जुन रत्नको सौन्दर्य, सहनशीलता, र परिवर्तनशीलता झल्काउने विशेषता हो।
मिस वर्ल्ड २०२५ को बारेमा
७२औं मिस वर्ल्ड प्रतियोगिता यसै महिना हैदराबादमा सुरु भएको थियो, जुन इन्डिया र प्रतियोगिता दुवैका लागि ऐतिहासिक महत्वको बन्यो।
उक्त प्रतियोगितामा नेपालबाट सृच्छा प्रधानले प्रतिनिधित्व गरेकी थिइन् । उनको प्रस्तुति र हाउभाउ औसतमा मात्र रह्यो । इन्डियाकी नन्दिनी गुप्ता पनि खासै उत्कृष्ट देखिन सकिनन् । प्रतियोगितामा विश्वभरका १०८ देशका युवतीहरूले ‘मिस वर्ल्ड’ प्रतियोगितामा भाग लिएका थिए ।
कार्यक्रममा बलिउड कलाकार तथा आर्कषक नायिका ज्याक्लिन फर्नान्डिस र इशान खट्टरको लाइभ प्रस्तुति रहेको थियो ।
सन २०२५ मे ७ मा सुरु भएको यो रोमाञ्चक प्रतियोगिता मे ३१ शनिबार नयाँ मिस वर्ल्डको छनोटसँगै समाप्त भएको छ । मिस वर्ल्ड प्रतियोगिता सन् १९५१ देखि सुरु भएको थियो।
चीनले दुई पटक उपाधि जितेको छ भने चार पटक आयोजना गरिसकेको छ ।
अघिल्लो वर्षको ७१औं संस्करण मुम्बईमा सम्पन्न भएको थियो, जहाँ चेक गणतन्त्रकी क्रिस्टिना पिश्कोभाले मिस वर्ल्डको ताज जितेकी थिइन्।
–एजेन्सी
